19.05.2012

"Каçал Ен"

М.Алексеева.

Майăн 16-мĕшĕнче районти культурăпа кану центрĕнче район администрацийĕн вĕренÿ пайĕн информаципе методика центрĕн ĕçченĕсем пуçарнипе «Самый классный классный», «Çулталăк вĕрентекенĕ», «Çулталăк воспитателĕ» районти конкурссен çĕнтерÿçисене чысларĕç.

Чи малтанах пухăннисем умĕнче район администрацийĕн вĕренÿ пайĕн начальникĕ Николай Максимов сăмах каларĕ.

«Паянхи кун районта 315 вĕрентекен ĕçлет. Вĕсенчен 91 проценчĕ — аслă пĕлÿллĕ, 82 проценчĕ — пĕрремĕш тата аслă категориллĕ. Хăйсен ĕçне чунтан парăннăскерсем, вĕренекенсене кĕнекесенчен илнĕ пĕлÿрен те ытларах параççĕ. Урăхла май та çук. Ача умĕнче пĕлÿ тĕнчин алăкне уçса, çитĕннĕ пурнăçа хатĕрлесе вĕсем унăн пуласлăхĕн, эппин, çĕр-шыв малашлăхĕн никĕсĕсене хываççĕ.

Хăвăрт улшăнса пыракан тĕнче вĕрентекенсене хăйсене аталантарма, тавра курăмне анлăлатма, ĕç мелĕсене çĕнетсе улăштарма, çĕнĕ технологисене алла илме хушать. Ĕмĕрхи хаклăхсене упраса тата пуянлатса пырса ĕçне чунтан парăннă учительсем инновацисене ĕçе кĕртеççĕ, педагогикăри опытне çĕнетсе пыраççĕ. Сирĕн ĕçĕр пархатарлă»,— терĕ Николай Аркадьевич, конкурссен çĕнтерÿçисене саламласа.

«Çулталăк воспитателĕ» конкурсăн çĕнтерÿçи ятне «Пучах» ача сачĕн воспитателĕ Алина Бурлакова тивĕçрĕ. Иккĕ-мĕшпе виççĕмĕш вырăнсене Эльвира Николаевăпа (Хирти Явăш) Наталья Долгова (Комсомольски, «Колосок») тивĕçрĕç. Зинаида Ксенофонтова воспитатель вĕсен ячĕсемпе ăшă сăмахсем каларĕ.

Районти чи лайăх класс ертÿçисене Тăманлă Выçли тĕп шкулĕн вĕрентекенĕ Александр Николаев чысларĕ. Кĕçĕн классен ертÿçисенчен чи пултарулли Людмила Алексеева (Комсомольски 2-мĕш вăтам шкулĕ) пулчĕ. Иккĕмĕшпе виççĕмĕш вырăнсене Светлана Игонинапа (Комсомольски 1-мĕш вăтам шкулĕ) Галина Краснова (Нĕркеç вăтам шкулĕ) çĕнсе илчĕç.

Вăтам классен ертÿçисенчен конкурсра Çĕнĕ Мăрат вăтам шкулĕн педагогĕ Ирина Борисова çĕнтерчĕ. Наталья Салмина (Комсомольски 2-мĕш вăтам шкулĕ) иккĕмĕш вырăн йышăнчĕ. Аслă классен ертÿçисенчен Комсомольски вăтам шкулĕнче пĕлÿ паракан Елена Свинина пĕрремĕш, Комсомольски 2-мĕш вăтам шкулĕн вĕрентекенĕ Светлана Краснова иккĕмĕш пулчĕç.

Районти «Çулталăк учителĕ — 2012» конкурс пĕтĕмлетĕвĕсем тăрăх Комсомольски 1-мĕшпе 2-мĕш вăтам шкулĕсен вĕрентекенĕсем Ирина Соловьевăпа (пĕрремĕш вырăн) Гелюсе Мавлютова (иккĕмĕш вырăн) чи ăстисем пулчĕç. Чĕчкен тĕп шкулĕн учителĕ Гельфие Зейдуллина виççĕмĕш вырăн йышăнчĕ. Вĕсене республикăри «Çулталăк учителĕ — 2011» конкурс призерĕ Наталья Салмина саламларĕ.

Çĕнтерÿçĕсене Дипломсемпе, хаклă парнесемпе чысларĕç.

Комсомольски 1-мĕш вăтам тата ачасен искусство шкулĕсен вĕренекенĕсем, «Пучах» ача садне çÿрекенсем юрă-ташă парнелерĕç.