01.09.2012

"Каçал Ен"

М.Илларионова.

Августăн 28-мĕшĕнче Комсомольски культурăпа кану центрĕнче районти учительсен августри конференцийĕ иртрĕ. Унта район администрацийĕн пуçлăхĕ Михаил Афанасьев, Чăваш Республикин вĕренÿ тата çамрăксен политикин министрĕн çумĕ Надежда Дмитриева, Чăваш Республикин Патшалăх Канашĕн депутачĕ Петр Краснов, ял поселенийĕсен пуçлăхĕсем тата ыттисем те хутшăнчĕç.

Конференци пуçланиччен Комсомольскинчи ача-пăча искусство шкулĕнчи «Островок» ушкăн ташăсемпе зала пуçтарăннисен кăмăл-туйăмĕсене çĕклерĕ. Ун хыççăн район администрацийĕн вĕренÿ пайĕн начальникĕ Николай Максимов «Пултаруллă ачасемпе ĕçлесси — вĕренÿ тытăмĕн приоритетлă туртăмĕсенчен пĕри» темăпа калаçрĕ. Сехете яхăн пынă докладра Николай Аркадьевич тĕрлĕ организацире — шкул, профильлĕ тата хушма вĕренÿ, культура, физкультурăпа спорт учрежденийĕсенче — ачасене пур енлĕ аталантармалли меслетсем çинче чарăнчĕ.

— Шкулчченхи вĕренÿ тытăмĕнче яланах ыйтусем çивĕч тăнă, тăраççĕ те. Юлашки çулсенче çак енĕпе районта чылай ĕç тунă. Педагогсен професси ăсталăхĕ мĕнле пулни пысăк пĕлтерĕшлĕ. Ăна вара олимпиадăсен тата конкурс кăтартăвĕсем çирĕплетеççĕ. Акă, ача сачĕсене çÿрекенсем республика шайĕнче иртекен тĕрлĕ конкурссене хутшăнса призерсен шутне кĕчĕç. Вĕсем: Иван Кузьмин, Степан Кириллов, Аделия Каримуллина («Пилеш»), Софья Кольцова, Иван Федотов, Яна Густомесова («Пучах»). Воспитательсем те ырă сăмахсене тивĕç. Сăмахран, Зинаида Ксенофонтова 2011 çулта республикăри «Çулталăк воспитателĕ» конкурсра «Манăн чĕре — ачасемшĕн» номинацире çĕнтерÿçĕ пулчĕ. Шел пулин те, районти шкулсенчи учительсен вăтам ÿсĕмĕ — 44 çул. Учитель профессийĕн сумĕ ĕлĕкхи мар. Кăçал аслă вĕренÿ заведенийĕ пĕтернĕ пĕр специалист та ĕçлеме килмен. Ĕç укçине ÿстерсен çамрăксем килессе шанма пулать. Иртнĕ вĕренÿ çулĕнче республика шайĕнчи предметсен олимпиадисенчи 8 призерпа мухтанма пултаратпăр. 2010—2011 вĕренÿ çулĕнче вĕсем 11-ĕн пулнă. Çĕнтерÿçĕсен шучĕ чакнă. Шкулсенче пултаруллă ачасем сахал мар. Вĕсемпе уйрăммăн ĕçлесси çине çителĕклĕ тимлĕх уйăрманнинчен килет çакă, — терĕ Николай Аркадьевич.

2011—2012 вĕренÿ çулĕнче иртнĕ олимпиадăсенче Комсомольски 1-мĕш вăтам шкулĕн вĕренекенĕсем 78-шĕ призерсем пулнă. Комсомольски 2-мĕш (70) тата Аслă Чурачăк (47) вăтам шкулĕсенче пĕлÿ пухакансем те малтанхи вырăнсене йышăннă. Пĕтĕмĕшле пĕлÿ паракан тĕл шкулсенчен Александровкăсен — 23, Анаттимĕрчкассисен — 12, Тăманлăвыçлисен — призлă 11 вырăн.

Районти шкулсенчи чи пултаруллă ачасене те асăнса хăварчĕ район администрацийĕн вĕренÿ пайĕн начальникĕ. Иртнĕ вĕренÿ çулĕнче олимпиадăсенче Эдуард Антонов (Александровка) 10 предметпа çĕнтерÿçĕ пулнă. Максим Минин (Хырхĕрри) — 10, Диана Мурзаева (Комсомольски 2-мĕш вăтам шкулĕ) 7 предметпа лайăх пĕлÿ кăтартнă.

Конференцинче пултаруллă педагогсен ячĕсене те асăнчĕ Николай Максимов. Вячеслав Мурзаев учителĕн (Комсомольски 2-мĕш вăтам шкулĕ) вĕренекенĕсем районти тата республикăри олимпиадăсенче 10 хутчен, Сергей Антоновăн (Александровка) тата Владимир Никифоровăн (Аслă Чурачăк) 9-шар хутчен çĕнтерÿçĕсем пулса наградăсене тивĕçнĕ.

Хальхи вăхăтра пур шкулта тенĕ пекех спортзалсемпе спорт площадкисем пур. Райцентрта «Кĕтне» ФСК уçăлни вара ачасен сывлăхне çирĕплетме нумай пулăшать. Районти шкул ачисем физкультура урокĕсене унта ирттересси ырă йăлана кĕнĕ ĕнтĕ. Анчах та унта занятисем йĕркелеме тренерсем çитменни пăшăрхантарать.

Каярахпа трибуна çине тухса Вера Герасимова («Пилеш» ача сачĕ), Людмила Орлова (Комсомольски 2-мĕш вăтам шкулĕ), Надежда Петрова (Нĕркеç), Ферит Гибатдинов (Комсомольски ача-пăча искусство шкулĕ), Елена Степанова («Кĕтне» ФСК) сăмах илчĕç, хăйсен ĕçĕ-хĕлĕпе паллаштарчĕç.

Ун хыççăн пухăннисем умĕн-че район администрацийĕн пуçлăхĕ Михаил Афанасьев калаçрĕ. «Вăтам шкултан вĕренсе тухакансем ППЭ тĕрĕслевĕ витĕр тухрĕç. Вырăс чĕлхипе экзамен тытакансен вăтам балĕ 61,18-па танлашать. Республикипе — 65,31 балл. Çак предметпа вĕрентекенсем кăçал çанă тавăрса ĕçлессе, республика шайĕнче иртекен олимпиадăсенче малти вырăнсене тухакансен шучĕ ÿсессе шанас килет»,— терĕ Михаил Романович.

Пирĕн районти шкулсенчен вĕренсе тухакансем 13-ĕн аттестат илеймен иккен. Ун çинчен пăшăрханса пĕлтерчĕ те министр çумĕ Надежда Дмитриева.

Залра пуçтарăннисене проект решенийĕпе Комсомольски 2-мĕш вăтам шкулĕн педагогĕ Надежда Боровкова паллаштарчĕ. Ăна конференци членĕсем пĕр саслăн йышăнчĕç.

Юлашкинчен пĕлÿ тата воспитани парас ĕçре пысăк çитĕнÿ тунă педагогсене Хисеп грамотисемпе, Дипломсемпе, парнесемпе наградăларĕç.